நீங்கள் தேடியது "ஓணம் பண்டிகை"

நாகர்கோவில்:

தமிழக அரசு பஸ்களில் கட்டண உயர்வு அமலுக்கு வந்த பின்னர், ஆம்னி பஸ்களிலும் கட்டணம் உயர்த்தப்பட்டது.

கட்டண உயர்வுக்கு பின்னர் நாகர்கோவிலில் இருந்து சென்னைக்கு அரசு பஸ்களில் ரூ.800-ம் குளிர்சாதன வசதி கொண்ட பஸ்களில் ரூ.1100 கட்டணமாக வசூலிக்கப்பட்டது.

பண்டிகை காலங்களில் ஆம்னி பஸ்களில் இக்கட்டணத்தை உயர்த்தி வாங்குவதாக அடிக்கடி போக்குவரத்து துறை அதிகாரிகளுக்கு புகார்கள் வந்தது. இதையடுத்து அதிகாரிகள் ஆம்னி பஸ் நிறுவனங்களுக்கு எச்சரிக்கை விடுத்திருந்தனர். கூடுதல் கட்டணம் வசூலிக்கும் ஆம்னி பஸ்கள் மீது கடும் நடவடிக்கை எடுக்கப்படும் எனவும் கூறப்பட்டது.

குறிப்பாக தீபாவளி, கிறிஸ்துமஸ், புத்தாண்டு மற்றும் பொங்கல் பண்டிகைகளின் போதே ஆம்னி பஸ்கள் இது போன்ற கட்டண உயர்வை பயணிகள் மீது திணிக்கும்.

ஆனால் இம்முறை ஓணம் பண்டிகைக்காக நாகர்கோவில் வந்த பயணிகளும் இந்த கட்டண உயர்வை சந்திக்கும் நிலை ஏற்பட்டது. இம்முறை நாகர்கோவிலில் இருந்து சென்னை செல்ல குறைந்த பட்ச டிக்கெட் கட்டணம் ரூ.2500 ஆக நிர்ணயிக்கப்பட்டது.

வழக்கமாக ஆம்னி பஸ்களில் பயணம் செய்வோர் முன்கூட்டியே ஆன்லைன் மூலம் டிக்கெட் பதிவு செய்வார்கள். ஓணப்பண்டிகை முடிந்து நேற்று ஊருக்கு புறப்பட ஆன்லைனில் டிக்கெட் பதிவு செய்த போது அங்கும் கூடுதல் கட்டணம் குறிப்பிடபட்டிருந்தது.

ஆன்லைனில் குறிப்பிடப்பட்ட டிக்கெட் கட்டணத்தை காட்டிலும் பயண நேரத்தில் வழங்கப்பட்ட டிக்கெட் கட்டணம் பல மடங்கு அதிகமாக இருந்தது. குறிப்பாக ரூ.800-க்கான டிக்கெட் கட்டணம் ரூ.2000-க்கும், ரூ.1100-க்கான சென்னை செல்லும் டிக்கெட் கட்டணம் ரூ.2500 முதல் ரூ.2800 வரையிலும் அதிக விலைக்கு விற்கப்பட்டது.

அரசு பஸ்களில் டிக்கெட் கிடைக்காமல் ஆம்னி பஸ்களை தேடிவந்தவர்கள் இக்கட்டண உயர்வை கண்டு அதிர்ந்தனர். அவர்கள் நேற்று தகராறில் ஈடுபட்டனர். இதனால் வடசேரி ஆம்னி பஸ்நிலையத்தில் பரபரப்பு ஏற்பட்டது.

இது பற்றி பாதிக்கப்பட்ட பயணிகள் கூறும்போது, அரசுதான் இக்கட்டண உயர்வை கட்டுப்படுத்த வேண்டும். வட்டார போக்குவரத்து அதிகாரிகள் இதுபோன்ற பண்டிகை நாட்களில் ஆம்னி பஸ்நிலையங்களில் முகாமிட்டு சோதனை மேற்கொள்ள வேண்டும்.

கூடுதல் கட்டணம் வசூலிக்கும் ஆம்னி பஸ்கள் மீது தயவு தாட்சண்யமின்றி நடவடிக்கை எடுக்க வேண்டும். அவர்களின் லைசென்சையும் ரத்து செய்ய வேண்டும். எச்சரிக்கை செய்கிறோம் என்று கூறுவதைவிட அவர்கள் மீது நடவடிக்கை எடுத்தால்தான் மக்களுக்கு பலன் கிடைக்கும். அதற்கு அரசு அதிகாரிகள் முன்வரவேண்டும், ஆன்லைனில் கூடுதல் கட்டணம் பதிவிட்ட ஆம்னி பஸ்கள் மீது உடனடியாக நடவடிக்கை எடுக்க வேண்டும், இதற்கு ஆன்லைனில் அவர்கள் பதிவிட்ட கட்டண விபரங்களே போதும், என்றனர். #OmniBuses

நாகர்கோவில்:

ஓணம் பண்டிகையையொட்டி மத்திய மந்திரி பொன்.ராதாகிருஷ்ணன் வாழ்த்து தெரிவித்துள்ளார். அதில் அவர் கூறியிருப்பதாவது:-

ஆண்டுதோறும் மலையாளம் மொழி பேசும் மக்களால் வெகுவிமரிசையாக கொண்டாடப்படும் திருவோண பண்டிகை திருநாள் வாழ்த்துக்களை தெரிவித்துக்கொள்கிறேன். வாமன அவதாரம் எடுத்து வந்த மகாவிஷ்ணுவோடு ஐக்கியமாகிவிட்ட மகாபலி சக்கரவர்த்தி இந்த நாளில் தன் மக்கள் வாழும் சிறப்பை காணவேண்டும் என்ற ஆசி பெற்ற நாளே ஓணத் திருநாள் ஆகும். மழையாலும், வெள்ளத்தாலும் பாதிக்கப்பட்ட தன் மக்கள் அதில் இருந்து விடுபட்டு வரும் காலங்கள் மகிழ்ச்சியாக அமைய அவர் மூலமாக வழி கிடைக்கும் என்று நம்புகிறேன்.

இவ்வாறு அவர் கூறி உள்ளார். #OnamFestival

சென்னை:

மத்திய மந்திரி பொன்.ராதாகிருஷ்ணன் வெளியிட்டுள்ள ஓணம் வாழ்த்துச் செய்தியில் கூறியிருப்பதாவது:

ஆண்டுதோறும் மலையாள மொழி பேசும் மக்களால் வெகு விமரிசையாக கொண்டாடப்படும் திருவோணப்பண்டிகை திருநாள் வாழ்த்துக்களை தெரிவித்துக் கொள்வதில் மட்டற்ற மகிழ்ச்சி அடைகிறேன்.

ஆண்டுதோறும் சிறப்பாக கொண்டாடப்படும் ஓணத் திருநாளில் மகாபலி சக்கரவர்த்தி வருவது போல் இந்த ஆண்டும் உறுதியாக வருவார். மழையாலும், வெள்ளத்தாலும் பாதிக்கப்பட்ட தன் மக்களின் அவலங்கள் நீங்கி இனி வரும் காலங்கள் இன்புறு காலமாக அமைய உறுதியான வழி அவர் மூலமாக கிடைக்கும் என நம்புகிறேன்.

இயற்கையின் சீற்றத்தால், மழை வெள்ளத்தால் பெரிதும் பாதிக்கப்பட்டு இவ்வாண்டு துயரத்துடனே ஓணம் பண்டிகையை வரவேற்க வேண்டிய நிலை கேரள மக்களுக்கு ஏற்பட்டுள்ளது.

தமிழகத்தில் வாழும் மலையாள மொழி பேசும் அனைத்து மக்களுக்கும், கேரள மக்களுக்கும் ஓணம் திருநாள் வாழ்த்துக்களை எனது சார்பிலும், தமிழ்நாடு காங்கிரஸ் கமிட்டி சார்பிலும் தெரிவித்துக் கொள்கிறேன்.

கேரளாவில் ஏற்பட்ட வெள்ளத்தால் பாதித்த மக்கள் அனுபவித்த துன்பங்கள், துயரங்கள், சிரமங்கள் நீங்கி மீண்டும் இயல்பு வாழ்க்கைக்கு திரும்பிடவும், நலமுடன், வளமுடன் வாழவும் இறைவனும், இயற்கையும் துணை நிற்க வேண்டி உலகம் முழவதும் உள்ள மலையாள மொழி பேசும் மக்களுக்கு த.மா.கா. சார்பில் ஓணம் பண்டிகை நல்வாழ்த்துக்களை தெரிவித்துக்கொள்கிறேன்.

பா.ம.க. நிறுவனர் டாக்டர் ராமதாஸ்:-

கேரளம் மிகப்பெரிய இயற்கை சீற்றத்தை எதிர்கொண்டு, அதிலிருந்து மீண்டு வரும் நிலையில் தான் ஓணம் திருநாள் நாளை கொண்டாடப்பட உள்ளது. மழை, வெள்ளத்தால் பாதிக்கப்பட்ட மக்களில் பெரும்பான்மையினர் இன்னும் வீடுகளுக்குக் கூட திரும்பாத நிலையில் அவர்களால் ஓணம் திருநாளை எவ்வாறு கொண்டாட முடியும் என்பது தெரியவில்லை. ஆனால் ஓணம் திருநாள் உலகம் முழுவதும் உள்ள மக்களுக்கு ஏராளமான பாடங்களைக் கற்றுக் தருகிறது என்பது மட்டும் மறுக்க முடியாத உண்மை.

திருவோணம் திருநாளை மகிழ்ச்சியாகக் கொண்டாடும் நிலையில், இயற்கை வளங்கள் மற்றும் சுற்றுச்சூழலை பாதுகாக்கவும், பராமரிக்கவும் அனைத்துத் தரப்பு மக்களும் உறுதியேற்க வேண்டும்.


அன்புக்குரிய மக்களைக் காண வருகை தரும் மகாபலி மன்னனை வரவேற்பதற்காக திருவோணம் திருநாளை கொண்டாடும், தமிழகம் உள்பட உலகம் முழுவதும் வாழும், மலையாள மொழி பேசும் சகோதர, சகோதரிகளுக்கு இதயங்கனிந்த ஓணம் திருநாள் வாழ்த்துக்களைத் தெரிவித்துக் கொள்கிறேன்.

இந்த நன்னாளில் அன்பு, அறம், அமைதி, சகோதரத்துவம், சமத்துவம், மனிதநேயம் ஆகியவை தழைத்தோங்கவும், அநீதிக்கு எதிராக ஒருங்கிணைந்து போராடவும் அனைத்துத் தரப்பு மக்களும் சபதம் ஏற்க வேண்டும்.

புதிய நீதிக் கட்சியின் நிறுவனர் தலைவர் ஏ.சி.சண்முகம்:-

கேரளாவில் ஏற்பட்ட மழை வெள்ளம், அம்மாநிலத்தையே அடியோடு சீர்குலைத்து விட்டது. தற்போது வெள்ளம் சற்று வடிய துவங்கி, பாதிக்கப்பட்ட பகுதிகளில் சீரமைப்பு பணிகள், நடைபெற்று வருகின்றது. கேரள மக்களும் தங்கள் துயரங்களில் இருந்து, மெதுவாக மீண்டெழுந்து தங்களின் பாரம்பரியம் தடைபட்டு விடாமல், எளிமையாக ‘‘ஓணம் பண்டிகையை’’ கொண்டாடிட வேண்டுமென்று கேட்டுக் கொள்கின்றேன். அனைவருக்கும் ‘‘ஓணம் பண்டிகை’’ நல்வாழ்த்துக்களை தெரிவித்துக் கொள்கின்றேன். #OnamFestival

ஆரல்வாய்மொழி:

தோவாளையில் பூ மார்க்கெட் செயல்பட்டு வருகிறது. இந்த மார்க்கெட்டுக்கு குமரி, நெல்லை மாவட்டங்களில் இருந்து பலவிதமான மலர்கள் விற்பனைக்கு கொண்டு வரப்படுகிறது. வெளி மாவட்டங்களில் இருந்தும் இங்கு வண்ண, வண்ண மலர்கள் வருகை தருகிறது.

தோவாளை மார்க்கெட்டில் இருந்து அதிக அளவு பூக்கள் கேரளாவுக்கே அனுப்பி வைக்கப்படுகிறது. கேரளாவில் கொண்டாடப்படும் முக்கிய பண்டிகையான ஓணத்தின்போது இங்கிருந்து கேரள வியாபாரிகள் பூக்களை போட்டிப்போட்டு வாங்கிச் செல்வார்கள்.

இந்த ஆண்டு ஓணம் பண்டிகை கேரளாவில் நாளை கொண்டாடப்படுகிறது. இதையொட்டி தோவாளை பூ மார்க்கெட்டில் நேற்று இரவு முதல் இன்று காலை வரை விடிய, விடிய பூக்கள் விற்பனை நடைபெற்றது. இதற்காக தோவாளை மார்க்கெட் நேற்று இரவு 8 மணிக்கே செயல்பட தொடங்கியது. மார்க்கெட் மட்டுமின்றி அந்த பகுதியில் உள்ள சாலையின் இரு புறங்களிலும் பூ வியாபாரிகள் பலவித பூக்களை குவித்து வைத்து விற்பனை செய்தனர். இரவு ஒரு மணி வரை மிகவும் குறைந்த அளவு பூக்களே விற்பனை ஆனது.


இதனால் தோவாளை மார்க்கெட்டுக்கு கேரள வியாபாரிகள் வருகை மிகவும் குறைந்து காணப்பட்டது.

நள்ளிரவு 1 மணிக்கு பிறகே தோவாளை மார்க்கெட்டில் பூக்கள் விற்பனை மும்முரமாக நடந்தது. இங்கு இருந்து பூக்களை டெம்போக்களில் ஏற்றி வியாபாரிகள் கொண்டு சென்றனர். நாகர்கோவில் உள்பட குமரி மாவட்டத்தின் பல்வேறு தனியார் பள்ளி, கல்லூரிகள் சார்பிலும் ஓணம் அத்தப்பூ கோலத்திற்காக அதிகளவு வண்ண மலர்கள் வாங்கிச் செல்லப்பட்டது.

நேற்று இரவு முதல் இன்று அதிகாலை வரை 60 டன் பூக்கள் விற்பனையாகி இருந்தது. கடந்த ஆண்டை ஒப்பிடும்போது பூக்கள் விற்பனை பாதியாக குறைந்து விட்டதாக வியாபாரிகள் தெரிவித்தனர்.

தோவளை மார்க்கெட்டில் இன்று பூக்கள் விலை உயர்ந்து காணப்பட்டது. பிச்சிப்பூ கிலோ ரூ.750-க்கும், மல்லிப்பூ கிலோ ரூ.500-க்கும் விற்பனையானது. கடந்த ஆண்டு பிச்சிப் பூ ரூ.1,250-க்கும், மல்லிப் பூ ரூ.1000-க்கும் விற்பனையானது குறிப்பிடத்தக்கது.

மற்ற பூக்கள் விலை இரவில் குறைந்தும், அதிகாலையில் உயர்ந்தும் காணப்பட்டது. ஒரு கிலோ வாடாமல்லி இரவு ரூ.70-க்கு விற்பனையானது. இன்று அதிகாலையில் பலமடங்கு விலை உயர்ந்து ரூ.400-க்கு விற்பனையானது. அதே போல ரோஜாப்பூ இரவில் ரூ.150-க்கு விற்கப்பட்டது இன்று அதிகாலையில் ரூ.300 ஆக உயர்ந்தது. சேலம் அரளி ரூ.200-க்கு இரவில் விற்பனை செய்யப்பட்டது அதிகாலையில் ரூ.300 ஆக அதிகரித்தது. மஞ்சள் கேந்தி ரூ.40, சிவப்பு கேந்தி ரூ.60, செவ்வந்தி ரூ.300, பட்டன் ரோஜா ரூ.300, சம்மங்கி ரூ.150, கோழிக்கொண்டை பூ ரூ.80, துளசி ரூ.50-க்கு விற்பனையானது.  #OnamFestival

ஒட்டன்சத்திரம்:

கேரள மாநிலத்தில் வரலாறு காணாத மழையால் எங்கும் வெள்ளக்காடாக காட்சியளிக்கிறது. தற்போது மழை ஓய்ந்துள்ள நிலையில் மீட்புப்பணிகள் தீவிரமாக நடந்து வருகிறது. வெள்ளச்சேதம் காரணமாக கேரள அரசு சார்பில் நடைபெறும் ஓணம் பண்டிகை கொண்டாட்டம் ரத்து செய்யப்பட்டு அந்த நிதி மீட்புப்பணிக்கு பயன்படுத்தப்படும் என கேரள முதல்வர் அறிவித்துள்ளார்.

வெள்ளபாதிப்பு காரணமாக ஒட்டன்சத்திரம் மார்க்கெட்டில் இருந்து காய்கறிகள் அனுப்பும் பணியும் பாதிக்கப்பட்டது. வியாபாரிகள் யாரும் காய்கறிகள் வாங்க வரவில்லை. மேலும் பக்ரீத் பண்டிகைக்கு இங்கிருந்து அதிகளவு மாடுகள் கொண்டுசெல்லப்படும். இந்த ஆண்டு மாடுகள் குறைந்த அளவே கொண்டு செல்லப்பட்டன.

தற்போது சாலைகள் சீரமைக்கப்பட்டுள்ளன. சில இடங்களில் பொதுமக்கள் நாளை மறுநாள் ஓணம் பண்டிகை கொண்டாட தயாராகி வருகின்றனர். இதில் பெரும்பாலும் சைவ உணவுகள் பரிமாறப்படுவதால் காய்கறிகளின் தேவை அதிகரித்துள்ளது.

இதனால் அதிகளவு வியாபாரிகள் ஒட்டன் சத்திரம் மார்க்கெட்டில் குவிய தொடங்கியுள்ளனர். மேலும் முகூர்த்த நாட்கள் என்பதால் காய்கறிகளின் விலை உயர்ந்துள்ளது. இருந்தபோதும் அதிகளவில் வியாபாரிகளால் கொள்முதல் செய்யப்படுகிறது.

சின்னவெங்காயம் கிலோ ரூ.40, கத்தரிக்காய் (20கிலோ பை) ரூ.400, தக்காளிபெட்டி ரூ.150 வரை விலை போகிறது. இதனால் விவசாயிகள் ஓரளவு நிம்மதி அடைந்துள்ளனர் கடந்த சில நாட்களாக வழக்கம்போல் கேரளாவுக்கு 100 லாரிகளில் காய்கறிகள் அனுப்பபடுகின்றன.

மேலும் திண்டுக்கல், கொடைரோடு பகுதியில் இருந்து அத்தப்பூக்களும் அதிகளவில் அனுப்பப்படுகிறது. ஓணம் பண்டிகையை யொட்டி காய்கறிகளின் விலை மேலும் உயரும் என எதிர்பார்க்கப்படுகிறது. #tamilnews

மேலசொக்கநாதபுரம்:

கேரளாவில் கடந்த ஒரு வாரத்திற்கு மேலாக கன மழை பெய்து வருகிறது. இதனால் 22 அணைகள் நிரம்பி திறந்து விடப்பட்டுள்ளன. பல நகரங்கள் தண்ணீரில் மிதந்து வருகிறது. பல கிராமங்கள் வெள்ளத்தால் துண்டிக்கப்பட்டுள்ளதால் உணவு மற்றும் குடிநீரின்றி தவித்து வருகின்றனர். மீட்பு பணிகள் முழு வீச்சில் நடந்து வந்தபோதிலும் இடைவிடாமல் மழை கொட்டி வருவதால் தடங்கல் ஏற்பட்டு வருகிறது.

கேரளாவில் பிரசித்தி பெற்ற ஓணம் பண்டிகை வரும் 25-ந் தேதி கொண்டாப்பட உள்ளது. ஓணம் பண்டிகைக்கு 10 நாட்களுக்கு முன்பாகவே அதன் உற்சாகம் தொடங்கி விடும். வெளியூர்களில் வசிக்கும் நபர்கள் 10 நாட்களுக்கு முன்பாகவே பண்டிகையை கொண்டாட சொந்த ஊருக்கு வந்து விடுவார்கள்.

வீடுகளில் அத்தப்பூ கோலமிட்டும், பல்வேறு வகையான காய்கறிகள் கொண்டு விதவிதமான சமையல் செய்து உறவினர்களை வரவழைத்து ஆனந்தமாக கொண்டாடுவார்கள். மேலும் சுற்றுலா இடங்களுக்கும் சென்று வருவார்கள்.

ஆனால் தற்போது பெய்து வரும் கன மழையால் விளை நிலங்கள் கடுமையாக பாதிக்கப்பட்டுள்ளது. வெள்ளத்தால் ஏற்பட்ட பாதிப்பை சீரமைக்கவே பல நாட்கள் ஆகும் என்ற நிலையில் இயல்பு நிலைக்கு திரும்ப மேலும் தாமதமாகும். சேதம் அடைந்த பகுதிகளில் சாலைகள் சீரமைப்பு, மின் கம்பங்கள் சீரமைப்பு போன்றவற்றுக்கு அரசு நிதி ஒதுக்கிய பிறகுதான் பணிகள் தொடங்கும்.

இதனால் ஓணம் பண்டிகையை கொண்டாட தயார் நிலையில் இருந்த மக்கள் தற்போது வேதனையில் உள்ளனர். வெளியூர்களில் இருந்து கேரளாவிற்கு வர இயலாத அவர்கள் வெள்ள விபரங்களை கேட்டு மழை நின்றபிறகு ஊர் திரும்பும் எண்ணத்தில் உள்ளனர்.